ب و ي ت ا ت !!!

[خليل الشبرمي]

.

حرام يا باشة الغيد = والله .. ورب البريه
لولاي اهاب المناقيد = واللوم والهرج فيه
لا اشق ثوبي ضحى العيد = وادنــــــــها ..... هاشــمـــيـــــه
وانخى جميع الاجاويد = تكفون ياهل الحميه
راع الهوى يالاواليد = شيلوه في مروحيه
لاحرّكتك هزت البيد = ترزم رزيم برديه
تكفون يم اتلع الجيد = ودوّه قبل المنيه
ولا تكثرون التناشيد = بالحيل حاله رديه
عيده عذاب وتناهيد = وجروح قلبه طريه
وشفّ العيون المراميد = شوفة رهيف الثنيه
ماجت على كيف ما ريد = مير الوعد بالضحيه
يامخلفين المواعيد = من غير ذنب وخطيه
وما ودي انقص ولا ازيد = واكشف امورٍ خفيه
محروم من فرحة العيد = من ذاق فرقا خويه