تكفيني الدله و تمر خلاص

[معيض الوادعي]

الاهداء للأخ العزيز / ظافر الخرصاني
عزمني للعشاء ولكن الظروف لم تمكني الحضور
وخيرها في غيرها
قصيدة تحمل هم والهم له اشكال كثيرة
رحلة من الدمام مع البرق والغيم والمطر والاعاصير
كانت المحرك والباعث لهذه القصيده
فلكم جميعا مع التحيه
((آاين الشاص ))

الى ظافر الخرصاني .. العلم يركب .. باص = ويمسى معه .. ما بين ربعه وجيرانه
حزام الوافاء والطيب والمرجله .. الماص = اذا لمسوا الجوهر .. تكلم على شانه
انا رايح الدمام .. والعلم ما هو خاص = انا شوف بعيوني .. في الجو بركانه
سرى البارق .. اللي من سحابة يبي المخلاص = تزفه رعوده .. بين نشوه وهتانه
أحب الخلا .. وأترقب الصيف .. والمقناص = وأمني .. هوا نفسي بشوفه .. وريضانه
أنا في ضميري حاجةًً تاتي .. بنغاص = إذا شفت نوض البرق .. ما طفت وديانه
عطاشا .. قبل ذاليوم .. يارب .. والقصاص = عجز ما لقى في الارض .. لقمه لرعيانه
عليك الفرج يالله .. لا تترك المنشاص = ترك خلقك .. وعود لك .. بروح إيمانه
سنين مضت .. يارب .. ما فادنا .. البقاص = عليها ومنها.. صارت الناس تعبانه
إذا ما يجي منك الفرج .. والخلف للخاص = ولأهل العموم .. الفقر يا كبر نيبانه
مقادير هذا الوقت .. ما تسعف القناص = ولا تعفي الشايب .. من إطعام ورعانه
يلبسهم الدفه .. ويشبعهم الغصغاص = بعد جيبه الكشخه .. وبشته .. وشيهانه
إذا راح يم السوق .. ينفط .. من القباص = وإذا عاد .. يم البيت .. يا ليل .. يا دانه
نسى كشخته ..والتذكره .. لا ركب لــ ارباص =وعود على ماضيه .. معزاه مع ضانه
على شان الاسهم .. يوم طاحت .. تقول رصاص = على أصحابها .. ما بين فاقد وخسرانه
بعضهم توفى .. والبعض منحكم بقصاص = على سلم الموتى .. يدور لكفانه
اسلى على نفسي .. وادور .. على المخلاص = ولا من دعتني ..المحفظه.. قلت.. غلطانه
أنا واحداً ثاني .. أنا للفقر .. رصاص = أنا راس مالي مشلح الفقر .. واحزانه
أنا ماني بحال الزمن .. والعرب .. بخاص= تقهويت فنجاله .. وسكرت بيبانه
على شان هذا .. يا عرب .. قلت .. وين الشاص= أبي البر .. مالي بالمدينه وعمرانه
ألا يا زمان البر .. والجمر .. والمفراص = رجعنا .. بعد .. ما ضبط الوقت .. ميزانه
تكفيني الدله .. وقرصي .. وتمر خلاص = وبراد شاهي .. فوق عودي ودخانه
خلاوي .. على الله رزقي .. ولا ني بـــ ملاص = من الواجب الغصاب .. أبا ثبت اركانه
أقوله .. وأجيب الوافيه .. ما .. نجيب انصاص= عوايد مضيف .. ما هضم حق ضيفانه
تسليني القيفان .. وأضرب بها من حاص = واغني بها للبحر .. وأصير ربانه
إذا كان ظافر .. يتقن اللعب .. والبحاص = يغني لي المعني .. ويعزف لي الحانه
وعليه.. العشى بالعافيه .. ويش من فغاص؟ = عسى الله يغرم .. يكفي معيض قيفانه

وسلامتكم جميع
تقبلوا تحياتي
اخوكم
ابونايف

[قديم الشوق]

شاعرنا المبدع / معيض الوادعي

صح لسانك والله يا ابو نايف

عز الله إنك مبدع وارويتنا شعر وإبداع

صح لسانك حتى ترضى

ويستاهل ظافر الخرصاني القصيدة

شكرا ً على هذا الامتاع

وتقبل فاائق تقديري واحترامي

[نووود]

قصيدة رائعة تتكلم عن نفسها وتحاكي واقع كثير من الناس

مشكور وصح لسان شاعرنا

[عسافه]

الشاعر / معيض الوادعي


صح لسانك قصيده في قمة الروعه


لاهنت


وتسلم يمناك


ودمت بخير


تقبل مروري المتواضع

[معيض الوادعي]

المشاركة الأصلية كتبت بواسطة قديم الشوق

شاعرنا المبدع / معيض الوادعي

صح لسانك والله يا ابو نايف

عز الله إنك مبدع وارويتنا شعر وإبداع

صح لسانك حتى ترضى

ويستاهل ظافر الخرصاني القصيدة

شكرا ً على هذا الامتاع

وتقبل فاائق تقديري واحترامي

اخوي الغالي قديم الشوق


شاكر لك تواجدك ومرورك على متصفحي


وما اضفته هنا وسام شرف اعتز به


بيض الله وجهك ولا هنت


تقبل تحياتي

اخوك

ابونايف

[لون الثلج]

:
صح لسانك من جد قصيده ابدعت فيها

واستمتعت بقرائتها

الف شكر لك ولا تحرمنا ابداعك

.