لا تعذلين القلب يا نفس ما فاد

[عبدالله النعيمي]

لا تعذلين القلب يا نفس مافاد= مهوب في حكمك ولا تقدرينه
القلب عند الغير مبلي ومنقاد= لو بالحجج يا نفس ما تقنعينه
بدل منام الليل سهر وتسهاد= وان تفهمي يا نفس هذي قرينة
الا نتصف ليله يزيد التوجاد= توجدي يانفس صرتي رهينة
صرتي رهينة عند حاجب وجلاد= فرض الهوى يا نفس هم طايعينه
سنوا عليك موبدن حكم الانفاد= والقلب عن قدرتك هم حاجبينه
غيرك يطيل النوم غافي ورقاد= وانتي لذيذ النوم ما تقدرينه
ياسيين يانفسي من السهر وشعاد = ياسيين خلي القلب لا تبحثينه
لاتبحثين جروح ترجع وتزداد= كفي حزين الصوت لا ترددينه
لاتبحثين حروق والام وانكاد=تنكا مواض القلب باول سنينه
سنين عاد الشوق غض بالفواد = تو الهوى ما فيه صد و ضغينة
ايا م كان الود صادر وميراد= من عيلم فيه المودة خزينة
نشرب قراحن ما خشر فيه نداد= عذب الروا مياح ما له وزينة
والحب لوع مهجتك يابن شداد= قبلي وابوزيد الهلالي طعينه
وقيسن شكا من قبلنا سقم الاكباد= ومحيسن جاب القوافي الحزينة
امثالهم كم عاودت قدم وجداد= وكلن على ليلاه يشكي حنينه
وانا سمل عيني من الدمع لهاد= حراق من قلب تزايد ونينه
الا ضواني الليل يرجع وينعاد= وان رمت دفعه ما بروحي عوينة
عبدالله المهنا النعيمي

[إنزوآء انثى]

صح لسآنك وإحساسك ياعبد الله

بقمه الروعه وليس بغريب عنك هذه الروعه

شكرا واكثر

دمت بود

[شاعر بلا قيود]

مميز يا مميز



صح لسانك

[نايف الروح]

صح لسانك وعلا شانك


وبنتظار القادم



تحيتي

[قديم الشوق]

عبدالله النعيمي

صح لسانك على هذه القصيدة الجزلة

دائما ً مبدع ومميز

الله يعطيك ألف عافية

وفي انتظار المزيد من هذا الجمال

وتقبل فااائق تقديري واحترامي

[ابو احمد]

ماشاء الله عليك

والله يعطيك العافيه وصح لسانك

قصيده فيها جمال في التكوين والصور الشعريه شيئ عجيب

وفقك الله.

[رمثي رحيمه]

عبدالله النعيمي
صح الله منطوقك نص جميل راق لي
مودتي