إعلاااان للي مابعد جرب الحب@ مجاراتي للشاعر محمد بن فطيس ووالده

نواف الشدادي · 25-10-2010, 11:14 AM

إعلان للي مابعد جرب الحب ،،، مجاراتي لابن فطيس ووالده،،

يقول الشاعر محمد بن حمد بن فطيس المري كنا جالسين بمجلس انا والوالد ومعانا نااس كثير نسولف

وقاال واحد من الجالسين أنا لقيت بيتين مكتوبه في مكان ما . واعجبتني قلت وش البيتين قااال :

إعلاان للي مابــعد جرب الحب @ يترك طريق الحب قدر إستطاعه

فيه الهناء يأتيك ساعه وينهب @ وفيه العناء يأتيك في كل ساعه

يقول بن فطيس سمعنا القصيده وكملنا سوالف وسهر ويوم رحت للبيت جلست أفكر في البيتين وكانت

معجبتني .

رجعت اليوم الثاني للمجلس وقلت ياجماعه أنا رحت للمكان اللي فيه البيتين هاذي ولقيت بيتين ثانيه

مكتوبه . قالوا وش هي قلت :

إعــلان للي مابــعد جــــرب الـــــحب @ يســـلك طريق الحب بس بشجاعه

فيه الوفاء والغدر .. والصدق والكذب @ وفيه الفراق .. وفيه شوق إجتماعه

حظك عــــلى حظك تشجع وجـــرب @ إن صبت وإلا ... مير تآخــذ منـــاعــه

يقول ضحكوا الربع وضحك الوالد وقال لي هاذي لمن ؟ قلت والله هاذي لي قال أعطيني ورقه ووقلم

وكتب :

إعـــلان للي مابــــعد جــرب الحــــــب @ يترك طريق مــــــــايجوز إتباعه

مــــع الــــرجاء والخوف واليأس والذنب @ لو دام وصله ماومنت إنقطااعه

شيءٍ غريب يذاع في الشرق والغرب @ تــرك القلاعه وإتباااع القلااعه

عااااد أنا وصلتني على الجوال مقطع صوووت ارسلها لي ولد عمي وسمعتها اكثر من مره واعجبتني

السالفه والبيوت وطلب مني ولد عمي أجاااريها وقلت : انا اصلا عاجبتني البيوت والحين تجيك مجاراتي

عاااد قلت :

إعلان للي مـــابعــد جــرب الحب @ يحسب حسابه قبل وقـــت إندفاعه

فــيه الفرح والهم .والدبج والعذب @ وفيه الوصل . والتضحيه . والقطاعه

جرب وشف وإن ماتتهنيت بالقرب @ يضيق بك كبــــر الفـــضاء وإتساعه

غامـــر وحـــب ان كـان ودك تعذب @ لأنه عذاب ومن مشى فيه صــــاعه

وإن كــان مـــاتقبل نــصيحة مجرب @ أقــــدم وراســك لا يــــهدك صـداعه

من تــذبحه يمناه مــاصـــار له ندب @ ولا أحدٍ بذاكر فالمــلاء شخص ناعه

وسلامتكم جميع .. أرجو أن تنال على رضاكم واستحسانكم

.. نواف الشدادي ..

قديم الشوق · 26-10-2010, 12:53 AM

نواف الشدادي

صح لسانك وانا اخوك

مجارة أكثر من رائعة

لشعراء فحول في الشعر

وقصيدة رائعة ومكتملة من جميع الجوانب

الله يعطيك ألف عافية

وفي انتظار المزيد من هذا الجمال

وتقبل فاائق تقديري واحترامي

نواف الشدادي · 26-10-2010, 12:28 PM

اقتباس:

المشاركة الأصلية كتبت بواسطة قديم الشوق

نواف الشدادي

صح لسانك وانا اخوك

مجارة أكثر من رائعة

لشعراء فحول في الشعر

وقصيدة رائعة ومكتملة من جميع الجوانب

الله يعطيك ألف عافية

وفي انتظار المزيد من هذا الجمال

وتقبل فاائق تقديري واحترامي

صح بدنك ياستاااذي

والله يعافيك من كل شر ويسعدك

على راااسي من فوق طال عمرك ولا حرمنا الله من تواجدك’,’,’,

ابو مهند · 26-10-2010, 02:04 PM

صح لسانك وعلا شانك 0 يعطيك الف عافيه

ملك بلا ملكه · 26-10-2010, 05:42 PM

صح لسانك ...
ومشكور على تألقك وحضورك اخوي نواف ....
مجاراه اكثر من رائعه ... ولكونها بعد مجاراه لشاعري المفضل محمد ابن فطيس ..
احييك مره اخرى ولاتحرمنا من ..ابداعك..
اتركك بود ...