تسأليني وش جديدي...

محمد جمعان · 26-08-2006, 04:59 PM

تسأليني عن جديدي ومادريتي وش جديدي =تدري اني كل يومن من غرامك في جديد
ساعه أحسك قريبه وانك أقرب من وريدي=وساعه أحسك بعيده وانك ابعد من بعيد
وان ضحكتي فز قلبي وانتثر فرحي وعيدي=وان زعلتي وابتديتي بالجفا أصبح شريد
من سكن حبك بقلبي وانتي بعيني تزيدي=وكل مايطلع نهار أحس حبك بي يزيد
تسألي القلب المعلق في غرامك ياعنيدي=مابلاه الا هواك ويعشقك والله أكيد
لاطروا أسمك أحس بداخلي طعن الحديدي=وانتي اللي ماسكن بالقلب غيرك ياعنيد
نظرتك وخطاك تشبه فزة الريم الشريدي=ومنك يأخذ ضامر الخصر وحلا لفته وجيد
وان تبسمتي تشع الشمس بالثغر الفريدي=مثل عقد اللول منظومن وبك غالي فريد
يابعد قلبي طلبتك اقربي مني وشيدي=داخلي قصر الغرام وأكتبي أحلى نشيد
واعزفي لحن الغرام بداخلي عذب النشيدي=وانثري عذب المشاعر وانا من بعدك أعيد
أقربي ياكل عمري وأنشدي عني قصيدي=والله إني مانظمته غير لك عذب القصيد
لك بنيت بداخلي حبي ولك قصرن مشيدي=وقلبي اللي من غرامك صايرن قصرن مشيد
لاتسالي عن فؤأدي أو تقولي وش جديدي=والله إني من غرامك كل يومن في جديد