قصيدة ( انت ايه )

[محمد المتولى]

انـــت إيــــــه
انت إيه
انت حالة
ايوه حالة
أعلى من كل الحالات
حالة لبساني في سرى
و(ف) كياني
و(ف) وجودي
شكلتني بالغـرام
حوطتنى بالألـم
صنفتني ( عاشـق للابـتلاء )
مرنتني (ع)العـذاب
والبكا والانتظار
جوه سراديب القلق
عرفتني عمق كينونة الهوى
علمتني كيف أكون
مرة عاقل فيلسوف
مرة دايب (م) الجنون
علمتني أكون حزين
بين جروحي بختفى
علمتني كيف أغنى
والألـم لحنى أنين
علمتني أكون جريء
البطل أبو الف روح
لاجل ما أحضنها وأطير
علمتني أكون بريء
الصفاء لابسه عباية
صوفي طيب .. مقصده
والمراد هو الحبيب
علمتني أخاف وأكش
وانزوى علشان أعيش
علمتني أكون عـبيط
ماشى بتحنجل بحظي
بشحت العـطف اللي زايد
من غلابة متعـوسين
علمتنى………….
الحنين
كيف يمشيني في ضله
يتخلق فيا أشـتيـاقى
يا دوائي وانت دائي
لما ترضى عليا بعـقل
وارجع الطفل المدلل
واكتفى بلحظة صفانا
جوه موال الهوى
اما هجرك فيه نهايتي
وابتلائي بالعجز
القصيدة فـيك غربة
الحنين جواك غربة
الأمـل ( ف) أيـديك غربة
والغـريب محتاج لشط
يرسى فيه ويهتدي
يا الشطوط ما تقربي
خلى قلبي يمنى نبضه
يا الشطوط ما تقربي
كيف أكون لك جوه حضنك؟
وابتلى بغـربة وأضيع
يا شطوط ليه بتخونينى ؟
انت إيه
انت حالة
ايوه حالة
حالة موشومة في جلدي
من ولادتي للممات
حالة هادية ..ثايرة ..عالية.. باهتة ..واضحة ..غامضة .. ساهرة .. نايمة . خايفة ..امنة
باقية دايما
في التحرك والسكون
عشقها ملهوش تملق
جوه (ف) عينيا يبـان
حالة حلوة
رغم أحزان المكـان
واشتياقي (ف) الغـرام
رغم قسوة الوشوش
والقلوب الميتة
رغم هجرك يا حبيبة
ياللى بكيتي حنيني
انت لسه منى فيا
حالة حلوة
ايوه حالة
حالة
حالة