الأمير الشاعر / محمد بن أحمد السديري (رحمه الله تعالى)

[قديم الشوق]

المشاركة الأصلية كتبت بواسطة عبدالله النعيمي

يقول: من شرّف على روس الاقذال = راس الطويل اللي نبا من رجومه

رجمٍ براسه للمشاكيل مدهال= ميقاع سمح الريش من عقب حومه

فكّرت بالدنيا.. بالأقفا والأقبال=تضحك وتبكي بالغاتٍ رسومه

وقامت همومي بالصناديق تجتال=وزفرات بانت بالضماير رقومه

حوّلت منه وخاطري للوفا.. مال=يم العزيز اللي فؤداي يرومه

لابو بدر.. ساس الوفا مرخص المال=اللي من المعروف فصّل هدومه

وافي ويلبس له من الطيب سربال=درعٍ عريضٍ ضافياتٍ كمومه

خطّه لفا.. في صفحة الطرس سيال=قافٍ بصفحة باغةٍ ومختومه

فتحت له بالقلب باب له أقفال=وفكري صحا.. لابو بدر.. عقب نومه

أهلاً عدد ما كان نازل ورحال=من سوق نجرانٍ إلى سوق دومه

واعداد ما يسكب من الغيث همال=وبلٍ على وبلٍ تسابع اهشومه

عقبه زهور الورد بالعشب تختال=فيه أم سالم كل رجمٍ تهومه

تعلب طرب بألحانها تشده البال=ما هيب من خضر الرياض محرومه

ما سايلت من قول شامت وعذال=وما همها نوّاب وفد الحكومة

راع الوفا.. له داخل القلب منزال=لو دونه ديار وساعٍ خرومه

يابو بدر.. تبدّلت كل الأحوال=حتى أشقر الجنحان بدّل ببومه

وجميع شيمات العرب صارت أطلال=مثل الهدام اللي وساع ثلومه

دنياً يشيّب هولها روس الأطفال=ولا عرفنا بدرها من نجومه

منها الجديد إمبدلينه بالأسمال=واوباش وأنذالٍ ترفّع خشومه

أقفت سنين الخير عنّا بالأعجال=وشفنا سنين السو شومه ولومه

دنياً ضحايا قدرها كل ريبال=نطّاح قالاتٍ يجي بالزهومه

دنياً بغفلتها ركض كل ختال=وكم خيّرٍ بالغدر توكل لحومه

الخبث له بايع وشاري ونقال=والطيّب إرخص مالقى من يسومه

وديك الدجاج معلّق فيه خلخال=وحطوا مفاتيح الذهب في إبهومه

القصيدة رد فيها السديري على قصيدة ل محمد بن راشد بن مهنا النعيمي حين قال:

لاحت سهوم النور بالفجر وانجال=جنح الظلام وفاختنّى نجومه
وقلبي يتّله من عراويه تلال=وأنا بقلبي داريٍ ويش قومه
جا له من الهاجوس ما خبّث البال=والقلب يا الأجواد عرقٍ وثومه
قلبٍ عطوف يمّ الأجواد ميّال=ومن كان مثلي فالعرب ما تلومه
لجواد عزّ الجار وزمول الاحمال=مثل السّهل فيه الدّمث والنعومه
لجواد وافين العهد قول وأعمال=طبايعٍ ما هيب درسٍ اعلومه
رجالهم عند الملازيم رجال=من هيّن الموقف تردّه سلومه
ورجالهم لو هو فقيرٍ من المال=يفدي بدمّه دون ذمّه ولومه
هات القلم واكتب تحيّات وأمثال=ومعانيٍ باقصى الضّمير محكومه
ما هاوت الهيّن ولا هافي الخال=ولا هيب للي يوهمنّه حلومه
وحاشا ولا يومٍ لها جات لسوال=عليا ومن طاري الزّهيد محشومه
تاقت لشغموم ورا بعد الاميال=والبعد ما يثني الفتى من لزومه
قمّ يا نديبي دن ما يطوى اللال= الى اشهب دون الحبايب ردومه
مكينة نوع من الجوهر العال=صلب الحديد اللي نضافٍ جرومه
ليكن حفيف بلوفها حثّ شلال=لاهيب ما تسمع ولاب مكتوبه
لونه زهي زلٍّ على سيته اشكال=روعه ومن غالي الحرير مخدومه
اسمر حمر كانه تحت في وظلال=وبالشمس لونا يوهمنّك سهومه
هبّاع قطّاع الريادي والاسهال=كدلك وتوه من امريكه قدومه
من جوبه الدمام يا بدر لامال=الفي والصحراء تلاشي سمومه
سربه بتوفيق الولي عالم الحال=العالي اللي ما نعلم مكتومه
يمّ الرياض العاصمة مهد الابطال=جيل على علياه تشهد خصومه
لاحل خلف قطيهن هوش وقتال=وشوق الفتية وهقنة وهمومه
اخوان نوره عند تاليهن ثقال=لاخوّع الجيّد وخارت عزومه
ومن الرياض اسرح عسى الرشد لك فال=سنّد وقيعان الخفية يمومه
ومنصاك بيتٍ للمراكيب مدهال=بيت الثّنا والمجد من فجر يومه
بيت الحسب بيت النسب بيت من طال=صيته ورا نجدٍ وجتنا علومه
بيت السديري بيت كسّاب الانفال=زبن اللهيف وريف بدّه وقومه
المحتسي للمرجله كار ورجال=لاجات من يمّ الشحيح مهزومه
محمدٍ ذرب النبا ذرب الافعال=رمز الزمان اللي تنحوا قرومه
عصر مضى زلت سنينه ولا زالال= العصر فات وباقياتٍ رسومه
سلم عليه اعداد ما هل هطال=وبلٍ من المنشى ترادف غيومه
غط الوطى ديمه ومن وابله سال=سيل يغبى ما نبي من حزومه
وقل له لفاني منه طارش ومرسال=وهدية بأعلى الوقار مختومه
هدية عندي لها كار واجلال=هدية في ذا السنين معدومه
سيرة وفا ما سايرت عصر الانذال=وان جات سذاج العقول مهضومه
وهاذي بعصر فات يالقرم ومحال=يرجع لنا الفايت وننسى همومه
وافي وشيمه يوم لجواد عقال=يوم النسب ما فيه عيبٍ يشومه
يوم النسب للي يعوجون للتال=لاجا نهار فيه للموت حومه
والا لمن ينزل على بيته انزال=بيتٍ من الميره وساع وضومه
ما هيب سلعة واحد عند دلال=هذا يبرق به وهذا يسومه
والحق للي يفرق السوم بريال=سلعة حراج ما وراها غنومه

شاعرنا / عبدالله النعيمي

أشكرك على المرور والإضافة

وبودي أن أعرف هل الشاعر / محمد بن راشد النعيمي على قيد الحياة

وتقبل فااائق تقديري واحترامي