قالوا علامك ؟ مصافحة أولى

[يزيد النمي]

.
..
...

أقول وعمر القاري يطول :

قالوا علامك كن غازيتك اكدار = ضايق وتسريبك كثير التفاكير
هو من هلك وصلتْك شينات الاخبار = أو طايحٍ في حب سيد الغنادير
قلت الذي قلتوه يالربع ما صار = بس اصبروا واخذوا جميع التفاسير
فالبال كسب المال هو سيد الافكار = سيطر على التفكير من وين ما اسير
ودي نحس انا مطانيخ تجار = ودي نصير من الرجال الهوامير
فالمال عز الناس جاه ومقدار = والفقر تال الوقت ذل المناعير
نبيه لا جانا ضيوفٍ وخطار = وجدودنا بالطيب ناسٍ مشاهير
نسلك مسالكهم ولو انه اعسار = عسرة على ناسٍ تهاب المعاسير
حيث ان بذل المال للعيب ستار = ونبيه يسترنا ليا صار تقصير
قالوا بالاسهم ربح ماهوب قطار = خيره كما وبل المزون المزابير
طاحوا عليه الناس من كل الاقطار = في كل بنك ماسكينٍ طوابير
قلت لهم الاسهم ترى لعب واقمار = قالوا لي ادخل خل عنك المعاذير
في سوق الاسهم يشبع اصغار واكبار = كلٍ تجر مير انت تخشى المحاذير
قمت ودخلت السوق ماهبت الاخطار= ما كني الا ياعرب سالم الزير
سطى على كل المخاليق واغار = وانا على اسهم سوقنا ساطي امغير
حطيت رجلي داخل السوق وانهار = وليت ياحظٍ قليل التباشير
تشوف عيني يوم طاحن الاسعار = حمرا تقل طعنة سيوفٍ مشاطير
وانا ادري ان حظي كذا دوم عثار = ياما عثر بي لا توسمت به خير
صفى رصيدي ما بقا به سوى اصفار = صفيت من ربحي بزود المخاسير
مير احمد المعبود علام الاسرار = فضله علينا ما تحيطه تقادير
ما جتني الجلطة ولانيب بشهار = ولا شلت دينٍ فوق متني كما النير
اسلا ، الا من قلت من ربي اقدار = والرزق من عنده مقسم بتقدير
وصلوا على سيد البرايا والابرار = المصطفى المختار ما غرد الطير

وسلامتكم