طالع من الشر يا بعد كل مخلوق

[زايد الروقي]

بسم الله الرحمن الرحيم


لا تحتاج الى مقدمه

.

طالع من الشر يا بعـد كـل مخلـوق=فينـي و لا تسهـر عيونـك ثوانـي
قلبي على دربك يسوق القـدم سـوق=و يحداه لمصافحك شـوق و حنانـي
من محجر عيوني غداء النوم مسروق=يومي نويـت النـوم طيفـك دعانـي
ادري مقصر يا حياتـي لـك حقـوق=معذور لو قلتـي مـا شفتـه وجانـي
نوباً وسيع الكون في عينـي يضـوق=رغـم ان قلبـي بالحيـاة متفـانـي
يشهد علي من ميز النـاس بفـروق=غصبً علي يا بنـت مانـي بأنانـي
و حلفت لك بمنزل الغيث مـن فـوق=انتـي حيـاة الـروح وانتـي كيانـي
مبغى زعلكم ياهل الحسـن و الـذوق=و في خاطرك لا تقول زايـد نسانـي
يغيب قلبي عـن حياتـه ثـم يفـوق=ويشكي على ضلوعه بوقتي عصانـي
وبانت على خدي مسارات و طـروق=من دمعي الي مـن عيونـي جفانـي
خلاص ابترك ثوب الافراح مشقـوق=و اترك طريـقً مـن حياتـي يعانـي
داخل حنايا الجوف يحرقنـي الشـوق=من بعدكم يـا زيـن شوقـي كوانـي
الحب ماهـوا سلعـةً داخـل السـوق=يبيعـه المخلـوق مـثـل الاوانــي
الحب حس و نشـوةً داخـل عـروق=عجزوا لـه العالـم بوضـع المعانـي
وكم هم ضحايا الحب عاشق و معشوق=و كم ترجـم العشـاق لحنـه اغانـي
احداً بحبه طفـل طايـش و مطفـوق=ما ينتشي لو صاح صـوت الكمانـي
واحداً ضحك و بعبرتـه دوم مخنـوق=من صرخته يهتـز صمـت المبانـي
و احداً يصور عزف الاوتار و يتـوق=يلقى بهـا المجـروح حكـي للسانـي
يطرب لها الخافق على العزف و يروق=و يصـوره قصـه لسيـد الغـوانـي
يرجي بها من بعد هالعتمـه شـروق=يمكن يـداوي جـرح عـوداً ليانـي
انام واصحى وغير حبك وش نـذوق؟=واجمع شتات الجرح وسـط المحانـي
يا ليت عندي قطعة ( الشال و الطوق)=واشـم عطـره كـود يحيـا مكانـي
صار الامل من جاير الوقـت مفتـوق=اطالعـه فـرحـه ولـكـن بكـانـي
اخايلـه غيـثً علـى بعـده بـروق=جالس واطالع نوض برقـه غشانـي
حلفت لك منت بعلى القلـب مسبـوق=ملكـت قلـبً منّـه الجسـم فـانـي
دايم وراع الحب يـا نـاس محقـوق=لو يخلص بحبه حكـوا عنـه خانـي

وسلامتكم