هي ضيعتني ضيعتني من العام

[نايف الجزاع]

اليوم هذا غير عن كل الأيام = حاول يزعزع قاسي الوقت متني
وتعبت أدور لجل حائي على لام = لام ٍ إليا صارحتها ريحتني
ترحم نزيفٍ ينقله حبر الأقلام = للناس وسنين ٍ خوالي بلتني
تطيعني ما همها هرج لوام = تطيعني تطيعني ما عصتني
ألعن بها ضعف الإرادة والأزلام = وأحضن يدين ٍ مقبلاتٍ دعتني
وأطعن بها جوف القهر ليل الأوهام = وأوهم هذيك بإن هذي خذتني
بها أقـٌوم طيحة الحظ لا نام = وأنسى همومي كلها لا لفتني
وأقتل بها زيف الأماني والأحلام = واسأل بقايا روحها وش عطتني
لها علي إني لها درع وحزام = وأنا إليا تهت بطريقي هدتني
وإن قلت أنا قدام جتني بقدام = ونفسي على قدامها شرهتني
هي ضيعتني ضيعتني من العام = يمكن لها حول السنه مالقتني
ولقيتها ريشه وأنا كنت رسام = أحيان تنكرني وهي عارفتني