ياليتنا متنا قبل موت ذيبان.. أو ليتنا متنا معه في مماته..

[ساير الرماحي]

بسم الله الرحمن الرحيم
لله ما أخذ.. وله ما أعطى.. وكل شيءٍ عنده بمقدار..
توفي أخي الوحيد في رمضان الماضي.. وهو صائم..
ولم يكمل 28 سنة من عمره.. ولم يكن يشكو من أي مرض..
بل هذه مشيئة الله سبحانه..
تسحّر.. وأمسك.. وصلّى الفجر.. ونام.. وفاضت روحه ..
لا يستأخرون ساعة ولا يستقدمون..
وارجوا كل من قرأ هذه الزَفَرَات أن يدعوا له بالرحمة والمغفرة.. وبالجنة..

صلّوا على محمد..

ياليتنا متنا قبل موت ذيبان
أو ليتنا متنا معه في مماته

ياليتني أقدر أعيده كما كان
أو ليتني معطي حياتي حياته

أقفى وخلاني بلا عون واخوان
وأجرع هموم الوقت ومزاولاته

دنيا بدونه مالها زود وألوان
أقفت بكل السعْد واحلا صفاته

دنيا تعيسه مابها خير واحسان
دنيا ماتستاهل نظر والتفاته

اقفى عني وانهد بالقلب بركان
حتى شرايين الفؤاد استماته

دفنتك بيدّي وأنا اخوك يا فلان
ياليتني دافن حياتي بذاته

وأقفيت دمعي من على الخد جريان
وش لي بدنيا عقبك أقفى حلاته

الحال والله يا عضيدي إلى الآن
موجوع من هالوقت ومداولاته

وش عاد أنا لو قيل زيزوم رمحان
ماهو بسالي قلبنا يا غناته

عاشرت عقبك هم واوجاع واحزان
وزفرات من صدرٍ تدانت وفاته

يالله يا غافر ورازق ورحمان
تقبل صيامه لك وتقبل صلاته

وتغفر له وترحم وتجزيه باحسان
وتجمعنا بالجنة وسط مغرياته

خليتني يالذيب من دون خلان
ابكي وليلي ماتذوّق مباته

مانجتمع لو راحت سنين واحيان
وماباقيٍ منه سوى ذكرياته

رحمه الله وغفر له.. وجزاه الجنة.. آمين..
أخوكم.// أبو راكان..