لا حياة لمن تنادي

[مشاري بن جلوي]

كان تبغى بالعسير وكان تبغى القاف هادي=القوافي ماعصتني كيف تعصى القاف اهلها
مادريت البيت ياتي لي رضى ولا عنادي=ومادريت ان المعاني ماتجي شخص ٍ جهلها
وانت خابرني وانا خابرك يالمجمول غادي=تحسبن الحب لعبه كل من جاها حملها
مادريت لكل درب اشكال وسلوم ومبادي=ولا يغير ماقفي بشفاك لو يقطر عسلها
ابتعد كانك تحسب الشوق يكبر بتمادي=لاتقرب شل محبتك العنيده وبك شلها
يوم صار الوصل ياخلي شبيهن للبعادي=قطع ياقلب ٍ عقب هذي تعنا ثم وصلها
والله اني لحرقه بنار والحقه الرمادي=ماتموت النفس دايم قبل ماياتي اجلها
لاتسلهم بنواظر عفت حتى اللي مرادي=ومابقى غير الوداع وهاتها ياترف قلها
باتصبر والصبر تاليه خير وذا وكادي=والهموم اتروح ماترسي ولايبقى خللها
واهجاد القلب كان الناس مثلك واهجادي=خاسر اللي بالمحبه مثل هذي هو قبلها
مايفيد الهرج معك ولاحياة المن تنادي=بانت الصوره وعذب الماء تخالط مع وحلها
ليت ماشفتك وليت الحظ ماجابك بلادي =ليت مثلك مايسود وليت ربي هو عزلها
دام من شرواك لو يرفع يوطيه الشدادي=ماتعود بالعدال ولايحب اللي عدلها
اقفل الموضوع كله دام كذب الليل بادي=اقفله وابشر بقاف ٍٍ عقب هذي هو قفلها