مساكم ورد ....
بصراحه أشتقت للمنابع وناسها وكل الاعضاء هنا , لاني توني واصل من السفر برحله ( عمل و
سياحه ) يعني اهي اصلاً عمل لكن أخرتها سياحه وبسولفكم عنها .
كنت طال عمركم بالقاهره كالعاده وشفت هناك شغلات كثيره ( غريبه وترفع الضغط ) مثل ..//
سكنت بفندق ( قراند حياة ) ويعتبر هذا الفندق هو السنتر بالقاهره فهو فايف ستار وبه مجمع تجاري
راقي , وأيضا دور سينما , ومطاعم , وقاعه احتفالات وحفلات ( ومزدحم باهل الخليج ) .
كنت أجلس بالليل احياناً ( بروحي ) عــ النيل وأشم هوى وأحياناً يكون معي صديق لي , وتفاجانا
ببعض مظاهر الموضه بين الجنسين اللي بصراحه غريبه , وتضحك يعني لما تشوفلك شباب ولابسين
بناطيل ( مادري شلون قايله ) تحس انك ودك تتبرع لهم بحفظات بامبرز الجديده نظراً لشكلها المقزز
فتكتشف انها ( موضه ) ..!
ولما تشوف مراهقات ماظهر منها اكثر مما خفى والميك أب تحس انها ( يبيلها حرب عشان تشيله)
ومو اقل من اسبوع عشان تمسحه تستغرب ومن ثم تكتشف انها ( موضه ) ..!
على قولة أخواننا المصريين ( موضة ايييييييييه دي ربنا يأأأأأرفهوم ) ..!
هذا غير سوالف البلوتوث والخرابيط اللي توجع بالمخ والمخيخ .
ركبت مع سايق تكسي مصري وقلت له ابي سوق يبيع ملابس اطفال فسمعته يقولي ( هتشتري
لاخواتك ) قلته لا ( هاشتري لبناتي ) فوجدت في وجهه الاستغراب ..وقالي ( يارااااااقل ..! أنته
متجوز , لأ موش ممكن ) قلته /// ( نصييبي أعمل اييييييه بأه ) ثم قال ( دنا مديكش اكثر من 23
سنه بالكتير اوي ) وهنا صدقوني لم اكترث بهذا الكلام يمكن الحريم يحبون اللي يصغرهوم يعني
لو تقول حق بنت وهي عمرها 30 شكلك 19 يمكن ( تعزك وتحبك اكثر من أهلها ) ولو تقولها
وهي عمرها 20 سنه شكلك 35 ( يمكن تكرهك وتدعي عليك بكل لحظه واعتقد ماتنام لمدة اسبوع)
عالعموم هناك البعض من الرجال يحبون ايضا اللي يصغرهوم لكني لست منهم :D .
المهم وصلت للمجمع التجاري واخذت لي جوله فيه عشان بأشتري لل قمرين اللي عندي الله يخليهوم
لي ( قولوا أأمين ) تدرون شنو المشكله ( انك لازم تشتري لانك مسافر ) مع العلم انه يوجد عندنا
بالكويت ( أحلى وأرخص) بس لازم تشتري وشريت ولله الحمد ومادري ليش تذكرت عبدالحسين
عبدالرضا في مسرحيه باي باي لندن لما قال لبنته وهي زايرته ب لندن ( ماصارت تشترون هدوم
كنكم جايين مفاصيخ من الكويت ..! ) فعلا ً هذا شي مو منطقي (اللي موجود عندنا احلى وارخص
صدقوووووني ) بس الشراء مايحلا الا بالسفر ( ظاهره سلبيه غير سليمه صراحه..! )
والحمدلله
اني رايح بروحي لاني ( لو مأخذ الحرمه وبناتها كنت الظاهر ماراح ارجع للكويت الا وانا مشتري
ملابس وهدايا يوصلون من كثرتهم لحجم ابو الهول ..! ) .
وفيه مظاهر شفتها ايضا بصراحه لم استسيغها فمثلا ً ظاهره ( الاعلام ) على الايد وعلى الكتف
(وكأن الواحد مايحب ديرته الا بالسفر ..! ) وكنت قاعد اسولف مع صديق سعودي وقلتله شرايك
بهالظاهره قال ( ياشيخ ناس ماخذينها موضه ) بصراحه ( الموضه هاذي مشكله ..! ).
علم السعوديه علم نفتخر فيه كلنا كمسلمين وعرب نحن ابناء الجزيره العربيه وبه كلمة التوحيد
ماذا يحدث لو سقط بالشارع المليء بالقمامه والاوساخ عافاكم الله ( ويعني ماطلع الحب الا وانت
مسافر ..! ) تصدقون شفت بعيوني بنت حاطه العلم مرسوم ( بخدها ) ..! ومتبرجه والعياذ بالله .
ان لا اتكلم عن السعوديه فقط وان كانت هي الاهم باعتبار العلم به كلمة التوحيد والمملكه حامله
لواء الشريعه باحكامها وقوانينها وفقها الله وسدد خطى ولاة أمرها , ولكن اتكلم عن كل من يضع
العلم وهو مسافر للسياحه ( ويبي يقول للناس كلها ترى انا احب بلدي ) يا اخي حب الوطن حق
علينا ويكون الحب بعكس صورة طيبه للبلد واهلها باطباعهم واخلاقهم وتعاونهم وحسن تشريف البلد
بالخارج له عده وجوه يستطيع المسافر ان يطبعه في فكر الاخرين ولكن ليس بهذه الطريقه , وأعلم
أن هذه الحالات لا تعكس بالضروره لصورة الأغلبيه ولكني اتكلم عن ظاهره انتشرت وبكثره وعلينا
ان نبرز سلبياتها للجميع لتتضح الصوره بشكل موضوعي وواقعي فلقد رأيتها شخصياً وبكثره .
عالعموم هي وجهة نظر مني اني أصبت فهذا ما أسعى اليه , وان اخطأت فارجو منكم المعذره .
وتأكدوا باني مشتااااااااااااق للمنابع وحبيت أصافحكم بهالمشاركه بعد السفر ......
ودمتم بــود ..:rose:
أنت غير مسجل في منتديات منابع الأدبية . للتسجيل الرجاء إضغط هنـا
19-08-2007, 05:45 PM
( الموضه .. مشكله ..!)
خالد ماطر 
العرض العادي
