يقطعك يا الهوجاس شليت فكري

[خليل المطيري]

بسم الله الرحمن الرحيم

محاوله اتمنى أن تنال استحسانكم وإعجابكم

والمعذره على ما فيها

يقطعك يا الهوجاس شليت فكري = خليتني بين التفاكير محتاس
خليتني في وضع قاسي وعسري = خليتني محتار ما ميز الناس
تعبت والحال انكوى وانت تدري = تعبت وهمومي على القلب جلاس
شربت من نبع الهوى كاس كدري = وغصيت من لقمة وحسيت الافلاس
ناديت باعلى الصوت والصوت جهري = ما احد سمعني غير روحي والأنفاس
رديت صوتي قلت والعلم بدري = يا للي معذبني ترى الوقت عساس
ياللي معذبني ترى العمر يجري = العمر ساعه مثل دقاااات الاجراس
عشتك واعيش الحب في وسط صدري = له جلجله بالجاش والحب حساس
حبيت من قلبي ولكن ما ادري = يا ليت ما ادري قلتها قبل ما انحااااس
لاغاب طيفك قلت يا قل صبري = وليا حضر طيفك كما هب نسناس
احيان دمع العين ينهل جبري = واحيان ضحكاتي كما طب الأوناس
اشب نار الحزن وازيد جمري = واكوي اجروح القلب واقول لا باس
لا باس ياقلب العنا زاد قهري = زاد القهر وانا مع الهم غطاس
بنيت في قلبي من الحب قصري = واليوم اشوفك قمت تحفر عن الساس
دنياك لو زانت ترى الوقت عبري = لا تحسب الدنيا مكاسب ومقيااااس
إن كان عذالك حكو لك وخبري = من يستمع قول العواذيل ينداس
حفرت لي يا طيب الأصل قبري = ودفنتني بين الهواجيس للراس

خليل المطيري
9/2/1426هـ