اسرح مع الهاجس على فكة الريق=وتضيق في عيني وساع البراحي

[حسين النجراني]

السلام عليكم وحمة الله وبركاته

في البدايه اقدم اعتذاري الشديد عن هذا الغياب الطويل واقدم لكم هذا النص واتمنى ان يحوز على رضاكم واكرر اعتذاري لكم على غيابي بسبب ظروفي العملية ودمتم

كم لي وانا انحت فوق روس الطواريق=وكم لي وانا اخفي لكن السد باحي
وكم لي وانا ارقى نايفات الشواهيق=وياليت قلبي من غثاه استراحي
انام واصحى وارجع انام وافيق=لا ارتحت في نومي ولا ارتحت صاحي
اسرح مع الهاجس على فكة الريق=وتضيق في عيني وساع البراحي
كن الدروب اللي تودي مغاليف=وكني محاصر من جميع النواحي
هم(ن)على قلبي مثل هامة طويق=لا احتلت فيه ولاهو اطلق سراحي
والموقف اللي سبب لصدري الضيق=واحتل فكري في مساي وصباحي
نكران فعلي ياملا زور تلفيق=من واحد(ن)من مقلة العين طاحي
حاولت اداري غلطته بس ما اطيق=بعض الغلط جمر(ن)على الكبد فاحي
ياليتها او ليتها يا مخاليق=من واحد(ن)دمه هدر مستباحي
لكنها بين الهدب والمعاليق=ياكيف اداويها وتبري جراحي
والضيقه اللي تزحم الصدر وتويق=بين الحنايا مثل زرق الرماحي
كم ليلة(ن)تطري على البال وتعيق=نوم العيون وخاطري مااستراحي

وسلامتكم


اخوكم/ حسين النجراني