لا يــا فهــد لا جاء بجوالك أبراج .. (أنابدوووي)

[أحمد بن ناحل]

السلام عليكم ورحمة الله وبركاته


أسعدالله أوقاتكم جميعا

آخر ماكتبت من القصيد ولعلكم تعذروني عن الغياب لانشغالي

لا يافهـد لا جـاء بجوالـك أبـراج=كلم علـى اللـي نفتخـر بـه ونفـداه
سلم سـلام ن حلـو صافـي وثجـاج=وقـل للأميـر الـذود برعـايـة الله
بأمرك جهمنا السبت ناويـن منهـاج=ناويـن نبعـد عـن ديـاره معشـاه
مع خشم بـرق ن ذيبهـا بليلهـا داج=(غمره) جنوبه كنك تشـوف ممشـاه
متنحر ن مابين (سلمـى) و (فرتـاج)=ومغيب شمس الصيف مابيـن أجحَـاه
عشًى وعقلناه خـوف مـن الاحـراج=لاينكف .. ويوم أصبح الصبح قدنـاه
قمنا على طرش ن بلونه كمـا العـاج=وتال المتالي ان خفت خطـاه نـدراه
وضح ن وبرها ناعم ن تقـل ديبـاج=وأرقابهـا تزهـا بمغـزل وعرقـاه
وطفنا ضواح (العش) ضلعان وفجـاج=و جينا لدار ن باسـم اهلنـا مسمـاه
(غار ابن ناحل) مذري الضيف والحاج=حجـاج بيـت الله تشكـر صنـايـاه
شبعوا (بملحاء ) اللي مثل مـد هـداج=حتى كتـب (لنـدن) تسطـر مزايـاه
ويوم اعترضنا ضلع (اجأ)كنه سيـاج=جيناه مـع (المختلـف) ثـم عبرنـاه
سقنا بممشاهـن تقـل سعـي حجـاج=لادرهمـوا بيـن الخطـوط المسـواه
لاهـن بقصـار ن ولاهـن بهجـاج=حذرا المزاول... سوق بصياح واوداه
وعشن بطيـن ن زاهـي ن للتفـراج=مقيضنـا اللـي قاصدينـه وصلنـاه
ربله .. وجنبه .. والنصي له تبهـراج=كنه ذهـب... يـوم النسايـم تمثنـاه
وعرفج .. وعاذر .. والسبط كنه علاج=لكبودهن والرمـث.. فرحـن بلقيـاه
وأنـا لقيـت بوسطهـن فلـة حجـاج=ربيـع قلبـي وانتعـاشـه وسـلـواه
فرقا الشوارع .. والبواري.. والازعاج=وشوف الخضار وسجة ن في ثنايـاه
أحد (بجرش)صيف والآخر (بقرطاج)=وأنا بدوي ن لي مـع الـذود مشهـاه
وش عاد لو جت جبهتي كنها الصـاج=بياض وجه الرجل من طيـب يمنـاه
والا الردي لو حط (واقي) و (مكيـاج)=والله مايبـعـد ســواده ويـجـلاه
يالله عسى مالـه مـع العالـم انتـاج=ويالله لا تكثـر بخلـقـك حـلايـاه
ودك يصيـر الرجـل للبيـد بــواج=أمـا بمقصـد شـغـل والا تنـفـاه
وأنـا بطبعـي ماعشقـت التـخـواج=مشتال معي (عقال ناقـه) و (تـوداه)
ماحلت في (معزا) ولا حلت (بنعـاج)=عاني بذود ن تعجـب العيـن رويـاه
ماهو ردى.... مير الغلا بخافقـي لاج=للنوق ... يسلم من لهـن مالـه أفنـاه
جزل العطايا اللي على هامتـي تـاج=راع السخاء والجود والوجـه والجـاه
كم شيخ قوم وشاعر وشخص محتـاج=حصل قـراه وعًـود بملـي مخبـاه
وياكم خراج ن ماطلب منـه مخـراج=ماهو ريـاء .. يتبعـه منًـه ومـأذاه
في شوف عيني ذي بجيـوب الأدراج=بالاسم .. والتاريخ .. والقيمه أعـلاه
وان كنت شاهـد زور فالحكـم فـلاج=عسـى مكانـي يـامـلا ماأتـعـداه
وأنا أحمد الله لا صعب وضعي وهاج=أبـوي .. بعـد الله ملجـاي بحمـاه
نور ن يبين اليا اظلـم الليـل وهـاج=أستانس بروياه وأمشـي علـى هـداه
يـارب يالمعبـود يـاوال الأفــراج=تبقيـه وسـهـوم المنـايـا تـعـداه
يالله تديم اللـي علـى روسنـا تـاج=اللي مـع الأجنـاب نفخـر بطريـاه
وليا فهـد وصًـف بتنفيـذ واخـراج=وقله تـرى يـوم الخميـس انتحـراه
وقل للذي ناوي على القيـض منهـاج=من عند (موقق) كان تصمـل نوايـاه

وتقبلوا تحيات أخوكم/

أحــمــد بن نــاحــل