ســـوق مــكــســور

[غانم الفايدي]

نظراً لعدم تمكني من إرسال رسالة للمشرفين ولوجود خطأ مطبعي وتعديل في بيتين آمل إستبدال النص السابق بالنص التالي وفقكم الله

السلام عليكم ورحمة الله وبركاته

بعد التحية
ارجو أن تعذروني على قل الحضور

اخواني واخواتي الكرام منكم من سمع ومنكم من عانى في سوق الاسهم، ومن بعد تجربة شهرين أنصح بدراسة السوق قبل التداول، وعدم الإعتماد على تحليل منشور بالمنتديات، وعدم التفريط بالسهم لأنه في نقطة أعلى من نقطة بيعك الشاري يبيع...

واليوم أزف اليكم المتواضعة التالية متمنياً أن ترقى الى ذائقتكم وفقكم الله.

يبقى السهم منساق في سوق مكسور=دام الظمير الحي قد مات بانسان
ودام بين اخوان تدليس مستور=يا كثر طبـَّـالين بالَنـَّـصب فرسان
يركض ورى المليون مليون مسعور=هامور والنصـَّـاب والفين حقران
شغـَّـال بالتحليل في سوق مدمور=تخطيط لعقول البشر قال غشمان
في منتدى الهامور تظليل منشور=مدعوم بالحلفان والزيف بهتان
والكلِّ من حرَّ الملايين مطيور=سمسار نصـَّـاب وهوامير سرقان
اسبوع يالهامور تجميع مسرور=سوق السهم دمران والجيب عمران
واتبيع في يومين بارباح مغمور=والشاري اللي بالسهم طاح ورطان
بلشان بالتهوير والحال مقهور=ثلثين راس المال بافواه طغيان
تدبيس بالتدليس والحقد مظمور=لا بدِّ يالمحتال في يوم خسران
تاكل حقوق الخلق والخلق مذعور=ما خفت من دعوات مظلوم تندان
يا ناس ما احد ٍ كان للبيع مجبور=يوم السهم تلميع بالكاد ربحان
واحنا اللي في مقدورنا خزم هامور=بالشرع والقانون للعدل ميزان
يوزن سهم في قاع بالكيف مسمور=يشبع محافظ ريعها زوع تخمان
وامساهم ٍ مسكين خمسين محدور=واسباب حدر السوق تصديق كذبان
واللي بقى التحفير في بير محفور=راحت خساير ردَّها صعب يا اخوان
الغبن صار بسوق للمال مشهور=واختامها ياالله تصلح لنا شان

وسلاااامتكم
أخوكم / غانم الفايدي