قصيدة ( السيمفونية الاخيرة للحلم)

[محمد المتولى]

السيمفونية الاخيرة للحلم

وعارفانى
انا منك
وموالى بيحكى فى الهوى عنك
بيحكى قصة حيرانة
بتنده فى الطريق الحلم
تلم حروف بتتسرسب
على الدمع الغريب اللحن
أشوف حدود معالمها
تروح فى العتمة شيلانى
**********
وعارفانى
وعارفة انى انا خلك
وعارفة كمان بشاورلك
على الجرح القديم
فى السر
على الجرح الجديد
فى الهجر
على الولد اللى سابنا
وراح يدور فى سواقى
غير الحلم
على الولد اللى خنقه النمل
الساكن فى عينك غصب
على الكلمة اللى غرقانة
ومش عارفة طريق البر
على الصمت اللى شل لسانى

وعارفانى
وعارفة بكام صبح دمك
بلقمة عيش ومحروقة
على عصب الولاد السمر
برسم مريض على
كل الوشوش الحمر
بهزة وسط مجنونة على الريالات
بمنديل كلينكس مستعمل
بعقب سيجارة "كليوباترا"
بحق " كاكولا " مش كسبان
بتذكرة قطر عداها
بقزازة كحة مشروبة
بعلبة سمنة مقلوبة
بكاس من بيرة مغشوشة
بعشرة طاولة مهزومة
بعضمة فرخة مرضانة
بعود كبريت . بقشر البيض
بضحك عبيط . بفتلة خيط
بنقطة زيت . بذرة ملح
بكلمة رخيصة مرمية
على جنب الرصيف فى البرد
بدمعة حرقة حضنانى
**********
وعارفانى
وعارفة ازاى بقى حالى
وانا مرسوم على بابك
حزين مستنى لجوابك
مجنون فى الحب والبلوى
سنين مشتاق تضمينى
وتحكى لى عن الشاطر
وست الحسن
صغير يا حبيبتى
مش قادر على شيل
التقيل "م" الحزن
غريب يا حبيبتى
مش عارف الاقى
لضحكتك عنوان
طريد يا حبيبتى من كفك
ونفسى ابطل التوهان
صغير محتاج لحكاويكى
ولكن فرغت الحواديت
وصار الشاطر الفارس
بليد مركون على الحيطة
وست الحسن حيرانة
بتخدم صاحبة الزيطة
وانا لسه بقول الحلم
واقول دى حبيبتى
شريانى
**********
وعارفانى
وعارفة انى انا مهزوم
من الوجع اللى فارد
كفه على قلبى
من النايمين على فرشى
بأمر الغول
من الخوف اللى بقع
لونه فى عبايتى
من الترابيزة والنايب
من الكراسة والواجب
من الابلة اللى عطيانى
دروس "ع"الحجر الليل
من بنت الجيران والسهد
والولد اللى قصده الكيف
من عصر انفتاح الست
"ع" الغجرية والهوسة
من البحر اللى خان الشط
وباع نسماته علشانى
**********
وعارفانى
وعارفة انى انا مجذوب
ادوب فى الحب ياما بادوب
وألف فيه قصص وكتاب
وعارفة ان ده مكتوب
أكون فى الحب مش جذاب
( اكون أو لا أكون )
ما خلاص
كلامى صار هوا مسموم
خلاص وعشت انا محروم
من النغم الل فى عينيكى
من النهر اللى فى ايديكى
من الضحكة اللى بتخبى فى جنتها
بتحمينى من النار اللى بتقرب
على الشجر اللى جذره أشيل
خلاص ما الزرع حصده قليل
وانا بستنى ويا الليل
وانادى وانت شيفانى

وعارفانى
وعارفة انى مش غجرى
ولا والدى زعيم كداب
ولا شيوعى ولا ثورى
ولا صورتى على الأفيشات
ولا عنتر ولا بيبرس
ولا أبو زيد
انا مكتوب أكون انسان
وعنوانى أكيد منسى كما العناوين
انا ملاح فى بحر الحلم
مش عارف أمان الشط
انا دمعة فى عين الضعف
مخفية فى بير الصمت
انا مولود ورا الكواليس
فى مولد صاحبه مش فايق
انا عاشق على الموال
حبيب بيحب ما يطولش
عشان بيقةل ولا يخبى
انا سواح وضاع عنوانى على يدك
بطوف فى الليل
ومش عارف طريق الصبح
انا مداح هويت صورتك
بغنى يا ليل يا صاحبى
واقول يا عينى خبيها
ولا تبوحى بسر الحلم
وسيبى ايديها تحضنى
وتسكن جوه وجدانى


وعارفانى
وعجبانى
لنا تفك ضفايرها
فى وش الشمس بتجنن
ساعتها بطير كما العصافير
وابوس الحلم فى جبينها
ساعتها بكون امير مفتون
واحنى الفل فى ايديها
بحك ياللى محبوسة
فى بحر النمل والعقرب
بحبك بالسكوت المر
بحبك همسة من قلبى
بحبك صرخة من جدى
بتقطع يد من سرقوا
بحبك وارتعش لما
بتيجى يدى فوق الجرح
بحبك واعشقك كلك
واقدم دمى ده مهرك
وحلمى عقد على صدرك
بحبك زى ما تكونى
عجوزة تلمى احزانى
صبية تملى احلامى
قديمة . دميمة . وعنيدة
اميرة . جميلة وغنية
عزيزة . مهانة منسية
كريمة وخاينة ووفية
بحبك غنوة وردية
لغيرى تكونى او ليه
بحبك ملحمة عاشق
تعيش فى قلوب بنات الحى
بحبك وارسمك لوحة
تتوه "موناليزا "
فى التفاصيل
بحبك وازرعك وردة
فى كف الحلم عشقانى
***********
وعارفانى
وعارفة انى ليك هاموت
بحلمى جوه بحر الصمت
بشعرى بره بطن الحوت
هامةت لما يبقى الليل غطاكى
فى الشتا "م" الغدر
هاموت لما يصحى الصبح
على صوتك ينادى النور
صباح الخير ……….
صباح النور……..
صباح بيهد قلب السور
هاموت لما يمشى النمل
بعيد عن بنى العصافير
هاموت فوق ايديك وصدرك
وانا واقف بحنى الحلم
هاموت وازرع الكلمة
على قبرى شجر أخضر
هاموت يا حبيبة
ويمكن تكونى لسه
فكرانى
وعارفانى
وعارفانى