مذكرات مليونير (( لا تفوتكم مرره تضحك ))

[صمت امرأه]

مذكرات مليونير
قال الحكيم عرق الأثلة قديماً ” قبل أن تبحر معي فك عقلك وحطه في كيسه ! ” ..
وها أنا ذا أقول لكم أني ولمت الأكياس بالقرب من باب الموضوع <<— يعني لا احد يدخل إلا فاك عقله
أسم الطالب : مذكرات مليونير .
المادة : ……………
السنة الدراسية : ……………
<<— كاتب مذكراته في دفتر أبو أربعين
1982 ميلادي
في إحدى الليالي الربيعية الدافئة وفي إحدى المستشفيات الراقية .. تحديداً في قسم الولادة ..
وبالتحديد أكثر في ثاني غرفة على اليمين بعد مكينة البيبسي اللي في السيب ..
سمعت هناك صرخات طفلٍ حديث الولادة .. طفلٍ تتقوطر منه البراءه ويتكبكب منه الجمال ..
ابيض البشرة ,أزرق العينين , أحمر الوجنتين , أشقر الشعر .. للأسف لم أكن أنا هذا الطفل ..
لقد كنت الطفل القبيح ذو الرأس المثلث في السرير الذي يليه .
قاطع نظراتي الحاسدة للطفل الجميل الذي بجانبي دخول والدي الثري للغرفة وهو يحمل في يده باقة
ورد وفي يده الأخرى مفتاح السيارة التي قد اشتراها هديه لي .. ثم دخل خلفه العديد من الخدم حاملين
معهم العديد من الهدايا والألعاب .. أقترب مني وقال لي وهو يلاعبني : منهو الولد المملوح ؟ .. منهو الوسيم ؟ .
. يا حلو .. يا قمر .. يا عسل .. لم أستطع أن انتظره حتى يفرغ من مدحي الزائف ..
نظرت إليه ولسان حالي يقول .. صدق من قال ( القرد في عين أمه غزال )
لم يتوقف والدي عن مداعبتي .. بل زاد الطين بله حين بدأ بوضع يديه على عينيه ثم إبعادها بسرعه
وقوله لي : دييي يا حلوو .. ديييي يا حلو .. نظرت إليه مرة ً أخرى وكانت نظرتي له هذه المرة مفعمة
بالتعجب وعلامات الإستفهام .. وكأنني اقول له .. من جدك الحين تتكلم عني ..
من جدك انا زين؟ .. بالله رح شف الولد اللي جمبي وأرجع .. صدقني بتعرف انك ماخذ مقلب فيني من جد
في هذه الأثناء دخل علينا في غرفة الحضانة عشرات الممرضات اللاتي قد أعطاهن والدي بقشيشاً للعناية بي .
. تبدأ الأولى بتمشيط شعري الذي لم يظهر بعد وتأتي الأخرى بمقص أظافر كي تقلم أظافري ثم تعقبها أخرى
وتضع في يدي جهاز التحكم عن بعد الخاص بالتلفاز ..
يقطع لحظات الدلال اللي كنت أمر بها دخول المدير المناوب للغرفة
.. يرمق الممرضات بنظرات مخيفه , تضع كل ممرضة ما في يدها من شدة الخوف
.. لا تزال نظرات المدير مستمرة لهم .. وقبل أن يخرجن من الغرفة تكلم قائلاً : ما شاء الله تبارك الله ..
هذا الغالي ( مستر أي ) ؟ .. تأكدوا لا يكون محتاج شيء !
1989 ميلادي
تتعالى الصرخات تلو الصرخات من قصرنا الكبير أثر شجار ٍ عنيف بين والدتي و والدي
.. لدرجة أن الجدران قد أغلقت أذانها وأثاث الغرفة قد خرج مسرعاً
وهو يقول : يوووووه وش ذا الإزعاج ما صارت عيشه والله
.. تتنهد والدتي وتخاطب والدي باستهجان: شف عاد .. تراني قلت لك يا ( أبو مستر ) ..
الولد ما راح يدرس إلا في مدرسة أهلية يعني ما راح يدرس إلا في مدرسة أهلية ! ..
رد عليها والدي وهو يحاول أن يهدي الوضع .. يا بنت الحلال قلت لك التعليم شيء مهم ..
والمدارس الأهلية الواحد يضمن نجاح ولده فيها قبل لا يسجله حتى .. حنا ما نبيه ينجح وبس .
. حنا نبيه يتعلم تعليم صح وتكون بدايته مع الدراسة بداية قوية
عشان كذا أنا قررت أسجله في المدرسة الحكومية اللي جمبنا .. على الأقل ولو للمرحلة الابتدائية بس ..
بحيث انه يتأسس تأسيس قوي من حيث التعليم .. مثلك عارفه يا ( أم مستر ) مدارسنا الحكومية تغيرت عن أول ..
ما عاد فيه مقولة ” لكم الجلد ولنا العظم ” زي منول ! ..
الحين التطوير شملها وابتعدت كل البعد عن الحفظ والترديد الغير مفيد .
. هذا غير أنها معروفة بحسن التعامل وحرصهم الأول والأخير على إيصال المعلومة
الصحيحة بأسهل الطرق دون المساس بالطلاب جسدياً أو عقلياً
في هذه الأثناء كنت جالسًا في فناء القصر وقد وضعت يدي على خدي والحيرة تعتلي محياي .
. أي سيارةٍ أختار كي يوصلني السائق بها للمدرسة ؟؟ ..
ولكن و بعد طول تفكير قررت أن أذهب بثلاث سيارات
.. سيارة توصلني والثانية توصل حقيبتي المدرسية والثالثة عشان تتأكد ان حنا ما نسينا شيء
***
بعد مضي مدة تعادل الإسبوع في ذاك الزمان ( تتكلم عن العصر الحجري أنت ؟ ) إذا بوالدتي توقظني في الصباح الباكر
وتخاطبني بصوتٍ حنون .. ( مستر أي ) .. ( مستر أي ) .. قم يالله يله تراك متأخر على المدرسة ..
يالله لا تتأخر زيادة ترى الساعة الحين تسع ( الساعه 9 ولك وجه تقولين لا يتأخر بعد ؟ ) ..
استيقظت ولبست ملابسي ثم خرجت من المنزل فإذا بي أجد أمامي حارسي الشخصي
والمربي الخاص بي ( طفاية ) وفي يده كوب من الحليب الساخن ..
خرجنا معاً واتجهنا للمدرسة و فور وصولنا هناك نزل ( طفاية ) قبلي كي يفتح لي الباب .
عندها سمعت أحد الطلاب وهو يقول لزميلة ساخراً .. شف شف لايفوتك ذا اللي مخلي
السواق ينزل يفتح له الباب .. ناقص بس فرشة حمراء و النشيد الوطني وتحس انك تشوف
حفل استقبال في القناة الأولى .. أردف زميله ساخراً مني هو الآخر .. خل فتحة الباب على جمب
وشف راس البزر بالله ما يذكرك شكله المثلث بالأهرامات ؟! ..
يضحك زميله على ذبته الماصلة علي ثم يردف .. تصدق أول ما شفت السواق ينزله من السيارة
حسبته مدرس رياضيات جديد عندنا وجالس ينزل عمل هندسي عشان يشرح لنا عليه .
سفهتهم ودخلت لمبنى المدرسة والطلاب في وقت الفسحة .. التفت فإذا بـ ( طفاية )
يمشي بجانبي ومعه حقيبة في يده .. سألته متعجباً : بتدخل معي للمدرسة يا ( طفاية ) ؟؟ ..
يجيبني : أيه يا مستر .. أمك موصيتني ومحرصتني عليك .. وبعدين ترى …..
قاطعته قبل أن ينهي حديثه وقلت : يوووه طفاية .. طفاية .
الحق وش ذا الناس اللي صافين ورى بعض ؟ .. اصبر اصبر لا تقول لي ! .
خلاص عرفت .. أكيد هذا اللي يسمونه ( سرى على مخبز تميس ) .. صح علي ؟؟
الله يا ( طفاية ) من زمان كان ودي اشوف مخبز التميس اللي يقولونه .. بسرعه بسرعه بروح اوقف
جمبهم هناك وانتي تعال صورني عشان أوري الصور لأمي ولأصحابي في الويب سايت حقي .
يضحك ( طفاية ) ثم يرد على استفساري المفعم بالدلاخة : لا لا يا مستر أي ..
هذا طال عمرك المقصف الطلابي .. هنا يبيعون الفطور والحلويات للطلاب اللي في المدرسة .
بعد عدة أيام يتلقى والدي اتصالاً من سكرتيره في الشركة ويخبره أن مدير المدرسة يريد التحدث إليه .
رد عليه والدي وقبل أن يبدأ بالتحدث معه إذا بالمدير يصرخ عليه قائلاً : مشينا أن ولدك يجي للمدرسة
كل يوم ومعه الحارس الشخصي وصرفنا مكتب الإشراف يوم شافوه وقلنا أنه عامل نظافة ..
وتغاضينا عنه وهو يجيب معه اللاب توب والبلاي ستيشن كل يوم للفصل وبرضو مشيناها
على مكتب الإشراف وقلنا أنها وسائل تعليمية للشرح ..
بس كون أن الولد يدور في الفناء المدرسي وهو يدخن سيقار !! .. وكون أنه يشتري كل يوم له
ولزملائه من المقصف ولا يدفع ولا ريال بحجة أن المقصف ما يحاسب ببطاقة الفيزا ؟ ..
هنا نكون وصلنا حدنا عاد .. واسمح لي أقول لك تعال خذ ولدك من المدرسة فوراً ..
ما عاد بقى الإ نحط في الفناء المدرسي مكينة صراف عشان نرضي ولدك بعد !!
عاد والدي للمنزل فوجدني مرتمياً في حضن والدتي والدموع تنهمر مني .. خاطبني مستفهماً : وش فيك ؟؟
.. لم أستطع أن أرد عليه فلقد كنت متغلقاً من شدة البكاء ..
ثم بادرت والدتي بالكلام : شف يا ( أبو مستر ) المدرسة ذي أبيك بكره تشتريها وتهدم المبنى حقها
وتحط بدالها محل بيع قطع غيار أو مطعم بخاري حتى … أهم شيء ينهد المبنى ما أبي ولدي بكره
إذا مر من عند المدرسة يتذكرها ويتذكر اللي صار له ويتعقد !!
طيب قولوا لي الحين وش اللي صاير ؟؟!! .. كانت تلك هي أخر جملة سمعتها من والدي قبل أن أفقد الوعي
حضنتني والدتي وهي تبكي وقالت : حسبي الله على اللي كان السبب !! ..
أمسك والدي بيدها وقال لها وهو غاضب : وش صاير للولد ؟؟
خاطبته والدتي وهي تمسح دموعها : تخيل اليوم المدير نادى ( مستر أي ) للمكتب حقه وعطاه الملف حقه
وقال له خذه لبيتكم خلاص أنت مفصول ! .. يتنهد والدي ويقول : أيه دريت انه انفصل .
المدير اتصل علي في المكتب اليوم .. تصرخ والدتي مقاطعةً كلام والدي : ما همني فصله من المدرسة أصلاً ,
اللي قاهرني .. هو طلب المدير من ولدي .. أجل يقول له شل ملفك !! .. أنا ولدي يشيل ملفه ؟؟
وش فايدة العمال الموجودين في المدرسة ؟؟ .. ليه ما يشيلونه عنه ؟؟ وإلا لازم يعقدون الولد يعني
أنا قلت لك من قبل مانبي مدرسة حكومية بس أنت ما اقتنعت وهه هذي هي النتيجة .
من بكرة لازم نشتري أقرب أرض للبيت ونبني فيها مدرسة خاصة عشان يدرس فيها .


نكمل في المره القادمة لما بنوا له مدرسة تابعوا لا تفوتكم الجاي احلى بكثير

محبتكم صمت