$ سااااال الكحل $

[نواف الشدادي]

$ سال الكحل $
عوده للتوااااصل

ياليل لاعاد السفر فيك ياليل
لاعادك الله والمسافه طويله

سافرت بك مابين هم وغرابيل
وجددت في قلبي جروحٍ عليله

وش فايدة مسراي كله بهـاذيل
وهموم قلبي جايره كل ليله

ماغير أسلي خاطري بالمواويل
أسلى وأسلي بالبيوت الجزيله

ما أقوى من جروح السيوف المصاقيل
كود المفارق بين خل وخليله

ودعتها ودموعها بالمناديل
تبكي وتدري رجعتي مستحيله

تهل دمع العين مثل الهماليل
يشبه لهملول المطر من مخيله

سال الكحل بين الرموش المظاليل
وهيه تلمه بالثنين النحيله

ياكيف حال اللي يبون المواصيل
والوصل كايد مالقوله وسيله

خفي عليَه ياليال المقابيل
قدام من فوقي تحط النثيله

خلصت من دنيا العنا والتهاويل
ماعاد أبي منها ولو كان ليله

بعيش وحدي لو ما به محاصيل
وإن زاد حملي بالعزوم أرتكي له

وأسج رجلي بالطرب والتماثيل
وقطع الخرايـم ما بدور بديله

ويرتاح بالي لا خذيت المعاميل
ونصيت وادي تو ماسال سيله

وشبيت ناري مع قروم وحلاحيل
الكل منهم في المواقف مهيله

أزين الدله وأسوق الفناجيل
كيفن ضبطته بـالعويدي وهيله

واليا تقهوينا تزين التعاليل
بين الرجال أهل الكرم والجميله

وأصد عن صحبة هل القال والقيل
أهل الدعايه والحكي والفشيله

يغنيني الله عن وجيه المهابيل
والله لأموت ولا تبعني هبيله

الشاعر / نواف الشدادي