يآآآآآه مصعب الفراق......!!!

[سلوة الخاطر]

رسمتك على غيمة صيف
أرعدت شوق وتولت جفاف
والملامح ضيعها العتاب
مرسومة بألوان الغياب
في غيابك مكسورة المرايا
والستاير نزلت على المشهد الأخير
معلنة نهاية الحكايا
وقصص بين الحقيقة والخيال

كيف أحضن وجودك وأنت وجودي
وكيف أشكو غيابك وأنا ضايعة حدودي
أدرورك في المدى
وأناظر الأفق
وأنتظرك مطر و غيم وسحاب
ولك في خافي الوجدان شوق ولهيب
كيف أفقدك...!!
وأنت ساكن روحي
لو تغيب عمرك ما تغيب

ليه صارت
ملامحنا غريبة
ماكأنا حبيب وحبيبة
هاجرت كل المشاعر
الوحشة سكنت الأماكن
وجفت ينابيع الغرام
وذبل ورود الأماني
والعطر يشهق في الأواني
والكفوف خضبها كحل الوداع

أبكي وأكابر يا صعب الغياب
كيف أكشف سر جنوني
كيف أفضح مكانك في عيوني
كيف أنشر خبر الغياب
على باقي شجوني
كيف أجاوب والحيرة سؤال
مابقى للأساور إلارنين الصمت
انفرط العقد بكف الأسى
والنحر مخنوق بغصات الحنين
والقرط نايم على الكتفين
ولا بقى للكحل
إلا مناديل الدمع
فارغة كل لحظة تمر
تشكي هم البين
مابقى غير وهن الشمع
وظلي الحزين
آآآآة وحدى
أنا والفراق
لا عناق ولا سهر
ولا ليل ولا قمر
ولا ورد ولا عطر
صار اسمك حرف
مشنوق على الشفايف
وصار الهمس حسايف
والشوق نغم خايف
لاهثة
أنفاس الوله
ذايبة في أعماقي الشجون
كيف أنسى...!!!؟
وكيف أخون....!!؟

كل الخطى تاخذني يمك
كنه مابقي لي دروب
واستند على جدار همك
واكتسي من ظلالك ثوب
واكتفي بطيفك
خطوتك تاخذني شمال
وخطوتك تاخذني جنوب
عايشة معك في الخيال
يرهبني شروق الصباح
مكتوب نفترق
أرفع كفوف
ترتجف
أغطي جبيني
لا أكتشف
صرنا بعاد
وأكابر لا أزعج سكونك
ولا أعيد نزف الجراح


كل ماقلت أتوب
وكيف أتوب
الله يا أجمل وعد
كم ناظرتك عيوني
وكم رسمتك على كف الوفا
وكم أشعلت لك مشاعري دفي
وكم حملتك هم وشوق ونغم
وكم بكيتك وكم صوت لك تعال
ورد الصدى صمت و محال

وكم كتبتك حروف
وكم همست احبك
وعاندتني الظروف
حبيتك نعم
ونسيتك مستحيل
حبنا مولود من صلب الوهم
ما يعيش إلا في الخيال

الله وأكبر
لصار الفراق صعب
ضايع بين حقيقة وهم
بين نظرة شوق
وهمسة عتب
والنسيان محال
تذكر...؟؟
لما قلت:
تصوري لو مر يوم
بلا سؤال...؟؟

وانا أسأل عنك حتى ظلالي
وأسولف للنسيم عنك
وأسولف لك لحالي
بقايا عطرك في شعري وشالي
وأكتب أسمك على رمل البحر
وأكتب و يمسحه الموج العنيد
كنه القدر
وقف مابين شوقي وشوقك
ومكتوب ابقى وحيد

أنا..؟؟
يوووه يا أنا

أنا

من يلقاك بشوفة كريم
من يهواك بقلب وعقل
ومن يقراك بلهفة محب
من فرقاك يرتمي سقيم
من يهدهد ليل همك
من يحبك في جنونك
ومجونك
وصخبك
وصمتك

تريد تبتعد أبتعد
أنا ما بسأل وينك....؟؟
لانك ساكن بعيني
بس والله ظلم...!!
وياصعب الغياب
لو اغمض
ولا تجيني حلم..!!