.::. وعكة زوجية .::.

[ضوى قطر]

صباح النور عاللي اصبحوا ومساء النور عاللي امسوا

جيتكم بموضوع يقرقع في قلبي

خلونا نشوف هالمشهد :p

.::.

دانه ونور وريم صديقات منذ الصغر..

دانه: تهقين نقول حق ريم ولا ما نقول لها؟

نور: صعبه تقولين لها ممكن نفسية البنت تدمر!

دانه: وصعبه نخليها جاهله بالموضوع وكل خلق الله كلوا عرضها من الحش!!

نور: توكلنا على الله نقول لها وامرنا لله .. عالاقل تسمعه منا اهون من غيرنا

.::. في بيت ريم .::.

ريم: نورتوا يابنات.. شلونكم؟

دانه: والله احنا بخير بس نبي نكلمج بموضوع وياليت تسمعينه بهدوء

ريم:

نور: انتي دريتي ان زوجج تزوج خدامتج ريتا من كم شهر ولا لا!!؟؟!؟!

ريم ( وهي تستعيد بذاكرتها موقف بعد تلقي الصدمه)

.::. في بيت ريم من ست شهور.::.

زوج ريم: قومي ياريم جهزي غداي وتغدي معاي..

ريم: انا تعبانه وراجعه من الدوام قول حق ريتا تجهز الاكل

(تدخل ريم الحجره وتنام )

ريتا تجي متمكيجه ومتعدله ومتجهزه وترز الاكل لابو العيال وترتز جدامه تنطر اشاره

شهبندر التجار :D

.::. في بيت ريم من اربع شهور .::.

زوج ريم: ياريم التفتي لي ولعيالج وبيتج.. العرس والحفلات ماتنفع.. ماقمت اشوفج ولا اقعد

معاج.. كل شي ريتا.. الغدا والعشا والتنظيف والعيال على ريتا.. وش دورج في البيت؟!

ريم:

.::. في بيت ريم في الوقت الحالي .::.

دانه ونور: حاولي تتفاهمين مع زوجج وتصلحين غلطتج قبل لا يفوت الفوت انتوا بينكم عيال

ريم: انا قررت اطلب الطلاق ,,

.::.

موقف يمر على اغلب البيوت.. ونسبه كبيره من الحريم تتعرض لموقف خيانه وزواج

زوجها عليها وطبعا اللوم في الاخير عالزوج لان ما يملي عينه التراب :p

بس لو خذت المره ساعه زمان تفكر في الواقع اللي وصلت له ممكن انها تستنتج اصول

المشكله.. المشكله اللي تنشأ بين الزوجين يكون كلا الطرفين مشترك فيها ومانقدر

نلقي باللوم بالكامل على احد منهم.. وانسحاب احد الطرفين يوصل الموضوع الى

نهايه مسدوده ومشاكل يتضرر منها الاطفال بالاخص

تحياتي وشكري للشخص اللي نبهني على مشكله مثل هذي :)