الأخوة والأخوات سأورد القصيدة ثم مناسبتها
الطيب شيمة والمبادي مفاريق=مبدى يجملبك ومبدى لحالة
ومن لااجتلد للطيب خسران ويعيق=ربعٍ تدور نفعته واجتواله
ومادام فالمرقاب عديت واويق=امد حبل الطيب وارهي وصالة
وليا انْصيت افزع ولا فيه تفهيق=واشمّر الساعد واكرّم سباله
ماحط من دون اللوازم مداريق=ولا اصد صدة منتوين النذالة
واسد فاللازم ولا فيه تفريق=وليا تعذر مانقصت الرجالة
اقدم المعذار جزل الطواريق=واكمل وجوبه ولاارخي احبالة
ماني من اللي للمدايح مطافيق=ناسٍ تدور للمدايح نفالة
المدح مايرفع سديح المطاريق=اللي تسدح من رداه وخمالة
والذم ماينقص رجال المغاليق=اللي تغلق فاللزوم بكمالة
والوقت مايبقى على حال وصفيق=لابد من يوم يلفبك حالة
ويشيلك حملٍ كما حرة طويق=وياكثر ماغيرك من الناس شالة
لكن يفرجها عليم المرازيق=الواحد اللي كل خلقة تسالة
والطيب عز وله غصونٍ مواريق=يقطف ثمرها طيبين السلالة
والحر يكفخ بالجناحين وشفيق=فالماكر اللي ماوراه وبدالة
والبوم يقعد فالخرابات ويخيق=متوسطٍ في عشته مع وثالة
والمرجلة تلقالها وسم ووثيق=والما يبين ولا تغطه انثالة
هذه كلام الصدق مافيه تبريق=والقول فعلة مثبتينه اقبالة
أتصل بي أحد الأشخاص لوجود موضوع له في أحد الدوائر الحكومية وأرسلته على شخص واتصل بي الشخص وتعذر بعذر يملى الصدر
ولم ينهي موضوعه وهو بجانبة فأخذ الهاتف وقال بيض الله وجهك واعتبر موضوعي منتهي وتراك معذور.
وبعد ساعتين أرسل هذه القصيدة عن طريق الجوال. ولا أدري عن نيته ومغزاه من ارسال القصيدة
ولكن أثارني بها بعض أبياتها فرديت علية وردي ليس لصاحبها حيث علمت مؤخرأ بأنها للشاعر / سعد بن شفلوت بل له هو
وهو ليس مدحاً لنفسي ولكن دفاعاً عني
والحقيقة اوردة قصيدة سعد هنا لإعجابي بها لتضمنها من الحكمة والواقع الشئ الكثير
فبيض الله وجهك ياسعد وصح لسانك
الطيب فرصه والجمايل توافيق=ومن لا توفق ماكتب له جماله
ومن لارقى للطيب روس الشواهيق=مازان له وقته على مابداله
ومادام لفعول الجمايل عشاشيق=كسب الجمايل مايجي بالسهاله
ولو انها تشرب مع فكة الريق=كلن خذاله كل ما أصبح بياله
والطيب منوه للقلوب المشافيق=كلن يتوق ومنوته راس ماله
والمدح مايزهي على الرجل ويليق=الا لا صارت وافيات خصاله
يستاهله رجلن يفك المزانيق=اللي يقال ونعم لا جا مجاله
ومن ساقته نفسه وهو مابعد سيق=لأجل الجميل يزين الله فاله
والمرجله ماهي بتحتاج تنسيق=من بين قلب اللي عشقها وباله
ومن عادة الدنيا تخون المواثيق=تفتر مكرتها سوات المحاله
ولولا اللوازم ماعرفناالمخاليق=مانعرف الرجال لين انعناله
والكفؤ تظهر فزعته حزة الضيق=وينشاف في الشده بعين العداله
نسل الرجال متعبين الملاحيق=متوسطن من بين عمه وخاله
واللي يطيق ولابغى قال ما أطيق=تحرم عليه المرجله والشكاله
والهينه تكبر على اللاش والهيق=لة فالرخاقاله وفالضيق قاله
والطيب شاره والضماير صناديق=واللاش طيبه ما تعدى ظلاله
وأنا أسبر قلوب الرجال المغاليق=والصامت أقطع غايته من مقاله
ومادام في الدنيا رجال ومطاليق=نصيتهم واللاش مالي وماله
نايف فيحان المقاطي
غيمار
أنت غير مسجل في منتديات منابع الأدبية . للتسجيل الرجاء إضغط هنـا
01-09-2006, 03:30 PM
الحر يكفخ بالجناحين وشفيق@فالماكر اللي ماوراه وبدالة
نايف المقاطي 
العرض العادي
