أم المسرحيّات (( محاكمة صــدام )) !!

[فهد الماجدي]

الله الدايم وغـيره ضـياع فـي ضــــياع
جــلّ رب الكون سبحــانه العدل البديع

المعـزّ الرافـع الـخافـض الــرب المطاع
المــذلّ المـعـطي الـمـانع البــرّ السميع

حوّل بصـــــــدّام للقاع من عقب ارتفاع
وقـّع ووقــعّ مـعه حـزبه وطاحوا جميع

وين صدّام البطل؟ وين صدّام الشجاع؟
طاحت اصنامه ولا له على ذنوبه شفيع

نصف شعبه مـــات بيدينه ونصفه جياع
الفصـول تـمـرّهــم كـلّها غـيـر الربـيـع

جرّهم للحرب والغـــزو من دون انقطاع
ان بـغــّـوا ولا ترى الموت لليّ ما يطيع

في بداية حكمه اشعل مع ايران الصراع
حول عشر سنين يشري من الموت ويبيع

لا السما زرقا ولا عـــاد ذاك القاع قاع
ماتشوف الاّ جريح توســــــّد له صريع

ان كسب له شبر عاد وخذوّا منّه ذراع
واستمّر الوضع مجنون واجه له صديع

ليّنوه ولان واصبح يـبي حـــلّ النزاع
ما يبي الاّ ينهي الحرب باللي يستطيع

والتفت للجار والجار له رزق ووساع
مادرى ان الجار لا ضيّع الجيره يضيع

سخـــــّر الله ظالمٍ ما يردّه الامتنــاع
امتناع الصين ما ململ الحشد السريع

سبعة اشهر مهلة كلها كـذب وخداع
يحسب انّه بيتذرّى ورا الحصن المنيع

جاه جيشٍ لاارتفع طمّن اللي في الرفاع
حوّل الظالم على الظالم وضاق الوسيع

واندحر جيش الغدر ذا قتيل وذاك ضاع
انسحاب عسكري ثم شرد مثل القطيع

راح عشر سنين واليوم جا يوم الوداع
يوم طاح الطاغيه ثم هوى الحزب الوضيع

جالس غاشــيه ذلــــّه بجلسة الاستماع
صار ذاك الوحش فالمحكمه حمل وديع

يرتجف والخوف في نظرته يعطي انطباع
(( كيف صادوني بحفره وانا قصري رفيع))؟

ينتظر صـــــدّام تشكيل هيــئه للدفاع
كم ذبح من شيخ .. من بنـت من طفلٍ رضيع

عـَــذبـُـوه
وعـَـلـّـقوا جــثـــته فوق الشراع

واحذفوه بغــبّة ينتهي فيها ويضيع !!



,,

فالح الهاجري