اضحك على حالي

[هيكل الشمري]

بديت باللي منزل الحق بكتاب = الواحد المعبود جزل الوهايب
ربن كريمن يرحم العبد لاتاب = هو قابل التوبه على كل تايب
ومن عقب ذكر الله عندي للاصحاب = قافٍ كتبته قبل اشد الركايب
هاكم بقايا الحزن مع ذكر الاسباب = وخلوني ارحل مع نسيم الهبايب
لا تمنعوني يالربع خاطري طاب = يشهد علي اللي يسوق السحايب
ماعدت انا مثل اول الوقت مرتاب = ولاعدت انا من قرصة الداب هايب
من مايعرف العيب لا بد ينعاب = ولابد ماتكثر عليه الطلايب
من ماينال الطيب في شقة الناب = صعبن عليه الطيب لاصار شايب
دنيا دنيه طفلها بساعةٍ شاب = من عاش في دنياه شاف العجايب
هذي ثلاث اسنين والقلب منصاب = جرحي قديم وهيضوه الحبايب
جرحن واذا زاد المدى زاد ماطاب = والبعد هو ساس البلا والسبايب
اخفي همومي وابتسم عند الاقراب = مابي ابين ضيقتي للقرايب
من قال وشلونك انا قلتله طاب = اضحك على حالي ولاني بصايب
غديت انا من عزة النفس كذاب = ان قلت طايب كذب ماني بطايب
صار الامل بيدي مثل حفنة تراب = ثم انتثر ودموع عيني سكايب
كل ماقضبته حيل بالحيل ينساب = واللي بقا بيدي حوته الشوايب