خطــــــوط الودّ

[عبدالله الدوسري]

تقطع خطوط الودّ و تصدّ مدّه=من دون ما تعطي معاذير و أسباب
ما كنْه جت بيني و بينك مودّه=يا صاحبي ما هو كذا طبع الأحباب
لا جيت لك بالرّفق تزداد شدّه=أسدّ باب الهجر و تفكّ لي باب
تكفى ترى صبري مشكّك بحدّه=و الفرق شاسع بين جِدِّي و لعّاب
إن جيت يكفخ خافقي محّد قدّه=و إن رحت صارت عيشتي عيشة أَغراب
يا صاحبي مغليك بيّحت سدّه=وش تنتظر يا سِيد تلْعات الأرقاب
كانه يهمّك أمره اليوم بدّه=لا تتركه ما بين نابٍ و مخلاب
أقبل عليه و حطّ يدّك بيدّه=كُثر الجفا ماله محلّ في الإعراب
من شرقي الّدوحه إلى بحر جدّه=ما شاقني غيرك من عموم الأصحاب
و ما كل من له شامة فوق خدّه=أسوق نفسي يِمّته وِدّ و إعجاب