الأسلاك الشائكه بين ( الأمهات ) و ( البنات )

[( حايره )]

الأسلاك الشائكه بين البنات والأمهات !!!!!!!!!!


تصادفنا في حياتنا الكثير من ( الأسلاك الشائكة ) التي يجب التعامل معها بحذر وإلاّ ستنقلب علينا
ويكون الضرر أكبر !!! من هذه الأسلاك والأمور ( علاقة البنات بالأمهات ... والعكس ) حاولنا الدخول إلى عالمهن
عبر هذه الأسلاك .. لنعرف ماذا تريد كل واحدة من الأخرى .. أو بعبارة أخرى فيما ينتقد كل طرف الطرف الآخر ..
وبالطبع الأمهات لسن بحاجة للنقد والملاحظات فيكفيهن الجنة التي تحت أقدامهن ..
لكن لنرى البنات فيما يشتكين من أمهاتهن .. والأمهات مالذي لايعجبهن في بناتهن


نوف الحمد ...... يحصل الإختلاف بيني أنا وأمي إذا كنا في السوق لإن اللي يعجبني
مستحيل يعجبها .. مع أنها تعرف أن اللي بالسوق هو الموضه وكل البنات تلبسه .

أما (سلمى) فمشكلتها مختلفة ..... مشكلتي أن أمي في البيت ماتنتقدني ولا تعلّق على أي شي ..
لكن تعالي شوفيها إذا كنا عند أحد أو أحد عندنا مايبقى تعليق وإنتقاد إلاّ حطته عليّ .. لدرجة أحس أنها ماتحبني ..
عشان كذا صرت ما أجلس عند الضيوف إذا جانا أحد في البيت .. ومستحيل اخلي أمي تجي عند صديقاتي
إذا زاروني في البيت والله مش ناقصه إحراج .

تشاركنا (شريفه سالم) بهذا الرأي الجميل .... صديقاتي كلهم يحسدوني على طريقة تعاملي
انا وأمي مع بعض .. لإنه عمري ما حسيت أن علاقتنا مجرد علاقة بنت وامها .. لا والله بالعكس أمي أقرب صديقه ليّ ..
أحكي لها عن كل شي يحصل معي .. وهي تستشيرني في امور كثيره .. والحمد لله ما أذكر أنه حصل
بينا أي خلاف أو إختلاف .

وتشتكي (هياء جارالله) من المقارنات التي تعملها امها !!...... طبعاً احب أمي وأحترمها
وكل كلامها على عيني وراسي .. بس ما أحب مقارنتها بيني وبين أي وحده ثانيه سواء من الأقارب
أو حتى من صديقاتي .. ونفسي ان أمي تعرف ان كل شي قسمه ونصيب .

(أمل) تبوح بما لديها ...... صراحة جيتي على الجرح .. لإن مشكلتي مع أمي أنها إذا كنا معزومين
عند أحد من أقاربنا ويكون عندهم شباب في سن الزواج تشوفين أمي تلح عليّ أنه لازم أساعد أهل البيت
أشيل معهم وأغسل أو أعمل أي شي ..والله هذا اللي ناقص بعد ..
أنا في بيتنا ما أشيل شي اجي عند الناس وأشتغل .

أما (منال العتيبي) فقالت ...... قبل كنت أحب أروح مع أمي للزواجات والمناسبات العائلية
لكن بعد تصرفات أمي قلت تووووبه أروح معها لأي مكان .. وأنا اقولك تصرفاتها يا طويلة العمر ..
إذا رحنا نحضر زواج او عزيمه تحرجني لإنها كل شوي تجي تناديني تعالي سلّمي على أم وفلان
وحبي راس أم علاّن .. وكأنها تقولهم أخطبوا بنتي !!!

(داليا الخالدي) تشاركنا ...... ما أحب تدخلات أمي في إختياري لملابسي وقصات شعري او صبغه ..
لإن وقتهم غير عن وقتنا .. وأنا ألبس على الموضه .. وألبس الشي اللي يناسب سنّي وجيلي .. لكن أمي
شكلها تبيني ألبس مثلها ومثل جدتي .وأتضايق صراحة من إنتقادها خاصة قدام الناس

سجينة أمها ( هكذا احبت ان يكون أسمها ) ..... للأسف أنا وأمي مستحيل يكون فيه توافق بينا ..
يوم عن يوم أحس ان الخلاف يكبر ويزيد .. لإن أمي تحب تتدخل بكل شي وتفرض رأيها بكل شي ..
وأنا خلاص كبرت المفروض ليّ رأيي .. إلى متى راح أظل الجاريه اللي تمشي ورا كلام امها ؟؟

(شيخه العجمي)..... أمي والله طيّبه وحنونه بس لو الله يفكّها من كلام الحريم اللي تسمعه ..
إذا جتنا أمي وجلست تتكلم عن التلفزيون ولا تشوفو الشي هذا ولا تتابعون هذا .. أدري انها سامعه الكلام من الجيران ...
وفيه شي ثاني اللي قاهرني بحياتي وهي ان أمي الدلع والحب عندها كله لعيالها .. وإحنا البنات كأنه بنات الجيران مو بناتها.
.
.