شاعر قصيدة يالله أنا طالبك حمر ن هوا بالي

[فهد الروقي]

السلام عليكم ورحمة الله وبركاته

من الابيات المشهوره البيت الذي كنا نسمعه في قناة المجد وهو

يالله وانا طالبك حمرا هوا بالي ** ليا روح الجيش طفاح جنايبها

والكثير لايعلمون لمن البيت او ماهي القصيده كامله

القصيده للشاعر (فراج ابن ريفه القرقاح) جد الشاعر المعروف فلاح القرقاح

كان عليه دم لواحد من جماعته من قبيلة (عبيده)قحطان. وجلى عن القبيله وانتظر (ابن شفلوت)

يحل القضيه بصفته شيخ قبايل عبيده لكي يعود لقبيلته في (طريب)

وكان قد جلى عند قبيلة (سبيع) وبعد مرور عشر سنوات

ارسل القصيده هذي اللي خلت الجميع يتحرك لها وعلى راسهم ابن شفلوت وانتهت الدم الي عليه.. ويقول:

قال ابن ريفه بدافي المرقب العالي = واعلا المراقيب تومي به هبايبها

يامرقبي جاك من الاسبار همالي = انصوب مزن من المنشا يهل ابها

ما يدهله كون صافي الريش ولوالي = ولا الولع يوم يفتك في عجايبها

انا ولد طارفه مانيب كسالي = اخاف من خبرة باحت مزاهبها

عليك يا مرقب جيته وانا سالي = هيض على القلب ديارنٍ شطيت ابها

هيض عليه شدوق ( الثفن ) لا سالي = عطفة ( طريب ) ليا زافت عجايبها

لامن غدا الفيض كنه زرع عمالي = سيله من القدم للبطنان ناهبها

كم مرة قد نزلنا عشبه المالي = بيوتنا لاوزا المجرم يلوذ بها

تنزله ببيوت عراف وجهالي = وانا جا النذر من خفيف مانزهبها

ربعي ( عبيدة ) الياجاء هوش وقتالي = هل هية في الضحى تشعا كسايبها

انشد ( عبيده ) هل الطولات من حالي = وانشد الاجانيب يوم انا نقربها

منهو يقلط على فرش وفنجالي = سعد ابن عمه لياجاته مكاربها؟!

لامن غدا بين نقاض وفتالي = وصفت الاجانيب واذاته بطلايبها ؟!

ثم جيتها ثم لفحت بهم على الجالي = لفح الدلي للمعدي يوم يجذبها

ياركب ميمونه في مشيها ارمالي = مايشتحن من هل العيرات راكبها

تزهي السفايف وتزهي الخرج وحبالي = ومجرب لاسرى في الليل صالبها

ملفاك من يلبسون الجوخ والشالي = ربعي ودرعي وضد اللي يحاربها

ملفاك شيخ القبيلة حامي التالي = عند ( ابن شفلوت ) يالمنجوب قربها

قل له على طالت المدة وانا ( جالي )= عشر( سنوات )مضت بحساب مقطبها

فان كان ربعي نسوني مانبي غالي = باعيش في ديرة قفرا جوانبها !!

في ايدي قرار تكف الجمع لاهالي = طويلة ناحل مقضب خشايبها

لي بندق ما صنعها الصانع التالي = من دقة ( المارت ) نحال مقاضبها

شريتها بالثمن يوم ارخص المالي = إميه وعشرين ما يمهل بغايبها

الله يرحمك يا عود شراها لي = من واحد جابها للسوق جالبها

حديدها واذكر الله كنه ريالي = كن الحيايا تطوافي مقاضبها

اقف بها بين ربعي وامنع التالي = لا خف ولد الردي ما احتال يزهبها

عط الطويلة عريب الجد والخالي = ولد الردي لا تلخونه يزول بها !!

واللي رفيع وللشوفات حمالي = ارفع نواصيه ياربي وقطبها

وانا من الخبرة اللي شورهم عالي = واهل سلوك الردي يارب تذهبها

بنت غراها زباد في ايد دلالي = ولا طموح هواها من يلاعبها

كم مرة قد ضربنا منجم خالي = وكم جملة فرقتها من ربايبها

وليا لفونا من المقناص زعالي = أحد مدح بندقة واحد يعذربها

بشرتهم العشا من عقب مقيالي = القايدة مع مرد الكوع ضاربها

اضرب بها الوعل لاجاد له تهنفالي = ابو حنية كبير الراس شايبها

ذبحت عشرة بها والظل ما مالي = والحاديه روحت تثلغ مضاربها

ويالله انا طالبك حمرا هو بالي = لا روح الجيش طفاح جنايبها

لا روح الجيش حاديه اشهب اللالي = لا هي تورد وسيع صدر راكبها

اللي على كورها واللي بالاحبالي = واللي على عيزها واللي بغاربها

لا روحت مع سباريت الخلا الخالي = كن الذيابه تنهش من ترايبها!!

تمت وصلوا عدد ماهل همالي = على نبي شروع الحق رتبها

اغفر ذنوب الفتى يالله ياوالي = لا جيت في حفرة رزوا نصايبها

وسلامتكم /م ن